2 Chronicles 25
1 亞瑪謝二十五歲个時做王，在耶路撒冷統治二十九年。佢个阿姆約耶但係耶路撒冷人。
2 亞瑪謝行上主看做著个事，總係無專心。
3 佢一堅固王權，就處死該兜暗殺厥爸个官員。
4 總係佢並無㓾死該兜人个子女，係照上主在摩西法律書中所命令个：「爺𡟓無應該因為子女所犯个罪來處死；子女也無應該因為爺𡟓所犯个罪來處死。逐儕應當擔當自家所犯个罪。」
5 亞瑪謝王召集猶大个人民，將猶大㧯便雅憫支族个人組織起來，照佢等所屬个宗族編做一千人一隊㧯一百人一隊个部隊，逐隊設立官長指揮。二十歲以上个男人全部在內，總共有三十萬人。佢等係特選个部隊，全部做得上戰場，盡會用槍㧯盾牌。
6 另外，亞瑪謝又用大約三千四百公斤銀仔對以色列請來十萬大能个勇士。
7 總係有一個神人來見王，對佢講：「王啊，毋好帶這兜以色列軍隊㧯你共下去；上主毋㧯這兜北國个人共下。
8 你若係一定愛去勇敢爭戰，上帝會使你在敵人面前失敗；事實上，上帝正有權決定輸贏。」
9 亞瑪謝問神人：「𠊎付給以色列軍隊該三千四百公斤个銀仔愛樣般呢？」神人講：「上主會賜給你个比這還較多！」
10 所以亞瑪謝將請來个軍隊解散，喊佢等轉去；佢等就當惱猶大人，氣噴噴仔走轉去了。
11 亞瑪謝拿出勇氣，帶領軍隊到鹽谷；在該位佢㓾掉一萬以東人。
12 猶大軍隊又捉到一萬人。佢等將捉來个人帶到西拉城个崩崗頂，對該位㩳下去，所以這兜人全部跌死在崩崗下。
13 同時，亞瑪謝所喊轉去个以色列軍隊卻攻打猶大逐城，對撒馬利亞直到伯‧和崙㓾掉三千人，搶走盡多財物。
14 亞瑪謝打贏以東人轉來，將以東人个偶像也帶轉來，立做自家个神明，向它兜跪拜燒香。
15 這事惹上主發譴，所以佢派一個先知去見亞瑪謝，責備佢講：「你做麼介拜該兜外族神明？它兜連救自家个人民離開你个手就做毋到！」
16 亞瑪謝插嘴講：「𠊎等敢有請你做國王个顧問？恬恬！樣般愛惹𠊎將你㓾掉！」先知就恬恬，佢又講：「這下𠊎知上帝已經決定愛消滅你；因為你做這事，又毋接受𠊎个勸話。」
17 猶大王亞瑪謝㧯佢个顧問商量後，派使者去見耶戶个孫仔、約哈斯个孻仔以色列王約華施，激佢講：「𠊎等來去戰場拚輸贏！」
18 總係以色列王約華施派使者去見猶大王亞瑪謝，應佢講：「有一擺，黎巴嫩山頂个一頭竻仔對一頭香柏樹講：『將你个妹仔嫁給𠊎个孻仔啊！』無想到，有一隻野獸對該位過，該頭竻仔卻被牠蹂掉。
19 亞瑪謝啊，打贏以東人你个心就恁驕傲噢！在屋下享福就好了！何麼死苦惹這個災禍，害你㧯猶大人民共下滅亡？」
20 亞瑪謝毋聽。這係上帝所決定个，愛亞瑪謝㧯猶大人民被人打輸，因為佢等拜以東人个偶像。
21 所以以色列王約華施帶領軍隊，在猶大个伯‧示麥㧯猶大王亞瑪謝相㓾。
22 猶大軍隊打輸，所有士兵全部走轉屋下去。
23 以色列王約華施在伯‧示麥捉到亞哈謝个孫仔、約阿施个孻仔猶大王亞瑪謝，將佢帶到耶路撒冷，然後進攻耶路撒冷，將以法蓮門到角門大約兩百公尺長个一段城牆全部拆掉。
24 約華施又將上帝聖殿肚个金仔、銀仔、俄別‧以東个後代看守个聖殿用品，㧯王宮个財寶全部帶轉撒馬利亞，也帶兜人質轉去。
25 以色列王約哈斯个孻仔約華施死後，猶大王約阿施个孻仔亞瑪謝還食加十五年。
26 亞瑪謝其他个事，對頭到尾全部記在《猶大㧯以色列列王史》底背。
27 對亞瑪謝悖逆上主該時起，在耶路撒冷就有人愛謀殺佢。最尾佢逃走到拉吉城，總係仇敵逐到該位，將佢㓾掉。
28 有人將佢个屍體用馬仔載轉，葬在猶大个城、厥祖先个墳墓肚。